Për të gjitha llojet e dëmeve, gjatë procedurës së trajtimit, mund të kërkohet dokumentacion plotësues mbi ngjarjen perveç dokumenteve kryesore, në rastet kur konsiderohet e nevojshme ndaj është e nevojshme të konsultoheni me ne paraprakisht për rastin tuaj specifik.
Kërkesat për rimbursim përmbushen në bazë te afatit të përcaktuar në kontratën përkatëse të sigurimit pas marrjes së gjithë dokumentacionit te nevojshëm kryesor e shoqërues.

Cdo personi të cilit i është shkaktuar një dëm nga përdorimi i mjetit të transportit brenda territorit të Republikës së Shqipërisë ka të drejtë të kërkojë dëmshpërblim për humbjet apo dëmtimet e pësuara.

Bazuar në Rregulloren Nr.53 datë 25.06.2009 “Për trajtimin e dëmeve që mbulohen nga kontrata e sigurimit të detyrueshëm në sektorin e transportit”, e ndryshuar, pala e dëmtuar ka të drejtën të paraqesë kërkesën për dëmshperblim me anë të avokatit tek :

a. Siguruesi pergjegjës i pronarit të mjetit të transportit, me të cilin është shkaktuar aksidenti (siguruesi i shkaktarit të aksidentit);

b. Siguruesi i drejtpërdrejtë (siguruesi i mjetit përfitues nga aksidenti), në rast aksidenti të dy mjeteve motorike të identifikuara dhe të siguruara me kontratë sigurimi të detyrueshëm për përgjegjësinë ndaj palëve të treta (TPL), ne rast se midis shoqërive të sigurimit është lidhur një marrëveshje;

c. Byroja Shqiptare e Sigurimit (BSHS), në rast se mjeti i transportit shkaktar i aksidentit, është i pasiguruar apo i paidentifikuar.