Problemet në punë lindin nga njohja e pakët e ligjit përkatës nga ana e punëmarrësit dhe zgjedhja e mos-reagimit për shkak se individët e dinë që jo cdo gjë funksionon ashtu sic duhet dhe është e vështirë për t’i shkuar cështjes deri në fund me sukses, kjo dhe për shkak të zvarritjeve nga organet kompetente.

Kodi i Punës, Ligji “Për shërbimin Civil” dhe dispozita të tjera ligjore e nënligjore përbëjnë një bazë të mirë ligjore për rregullimin e marrëdhënieve të punës dhe për t’i mbrojtur punëmarrësit nga largimet abuzive nga puna.

Konfliktet e mundshme në këtë drejtim mund të zgjidhen me mirëkuptim nga palët, në të kundërt ata mund t’i drejtohen me avokat, sipas rastit, Komisionit të Shërbimit Civil dhe gjykatës kompetente, vendimet e formës së prerë të të cilëve janë të detyrueshme për zbatim nga palët.

Në rastet e zgjidhjes së menjëhershme të pajustifikuar të kontratës së punës nga punëdhënësi, gjykata, duke vlerësuar të gjitha rrethanat, vendos detyrimin e punëdhënësit që të dëmshpërblejë punëmarrësin me maksimumin e pagës që do t’i takonte për një vit punë, e cila i shtohet edhe pagës që ai duhet të marrë gjatë afatit të njoftimit.
Për punëmarrësit në administratën publike, kur ka një vendim të formës së prerë për kthimin në vendin e mëparshëm të punës, punëdhënësi është i detyruar të zbatojë këtë vendim.